Upcoming Events

ಸಂಸಾರಿ ಇಷ್ಟ್ ತುಕಾ ಲೆಕಿನಾ
ತುಂ ಎಕ್ಸುರೊ ಆಸ್ತಾನಾ
ತುಕಾ ತೊ ಲೆಕ್ತಾ
ತೊ ಎಕ್ಸುರೊ ಜಾತಾನಾ

ತೊ ಕಾಮಾ ಪುರ್ತೊ ಮಾಮಾ
ಮತ್ಲಬ್ ನಾಸ್ತಾಂ ಯೆನಾ
ಕಾಂಯ್ ಫಾಯ್ದೊ ನಾಸ್ತಾಂ
ತೊ ಬರೆಂ ಉಲಯ್ನಾ

ಸುಖಾಂತ್ ಚೊವಿಸ್ ವರಾಂ
ತೊ ಸಂಗಿಂ ಆಸ್ತಾ
ದುಖಾಂತ್ ದಿಸನಾ
ಸೊದ್ಲ್ಯಾರ್‌ಯಿ ಚೊವಿಸ್ ವರಾಂ

ಕಷ್ಟಾಂ ವಯ್ರ್ ಕಷ್ಟ್ ಯೆತಾನಾ
ಇಷ್ಟ್ ಪಳೆಂವ್ಕ್ ಮೆಳನಾ
ತೆದ್ನಾಂ ಕ್ರಿಸ್ತ್ ಮಾತ್ರ್ ಮೆಳ್ತಾ
ಕಿತ್ಯಾಕ್ ತೊ ತುಕಾ ಸಾಂಡಿನಾ

ನಷ್ಟಾಂ ವಯ್ರ್ ನಷ್ಟ್ ಜಾತಾನಾ
ಇಷ್ಟ್ ದಿಷ್ಟಿಕ್ ಪಡನಾ
ತೆದ್ನಾಂ ಕ್ರಿಸ್ತ್ ಮಾತ್ರ್ ಆಸ್ತಾ
ಕಿತ್ಯಾಕ್ ತೊ ತುಕಾ ವಿಸ್ರನಾ

ಕ್ರಿಸ್ತಾ ಪರಿಂ ಖರೊ ಇಷ್ಟ್ ನಾ
ತುಂ ಕಷ್ಟಾಂ ಮಧೆಂ ಅಡ್ಚತಾನಾ
ವಾ ನಷ್ಟಾಂ ಮಧೆಂ ಚಿರ್ಡತಾನಾ
ತೊ ಅನಾಥಾಂ ಪರಿಂ ಸಾಂಡಿನಾ

- ಲ್ಯಾನ್ಸಿ ಕಾರ್ಡೊಜಾ ತಾಕೊಡೆ