ನೆಸ್ಣಾಚ್ಯೊ ನೆಟಾಂಚ್ಯೊ
ವಂದವ್ಣ್ಯೊ ಫ್ಯಾಶನಾಂಚ್ಯೊ
ಸಂಸಾರಾಚ್ಯಾ ವೆಸಾಂಚ್ಯೊ
ತ್ಯೊ ಕಿತ್ಲ್ಯಾ ವೆಳಾಚ್ಯೊ?

ಅಗೊ ಭಯ್ಣಿ ವೇಳ್ ಜಾಲೊ
ತಿ ಪಾಟ್ಲಿ ಜಿಣಿ ಬದಲ್ಚೊ
ಆಸಾ ಎಕ್ಲೊ ಭಗ್ಶಿತಲೊ
ಬಾಯೆ ಮ್ಹಣ್ ಆಪಯ್ತಲೊ

ದುಡ್ವಾಚ್ಯೊ ದಿರ್ವ್ಯಾಂಚ್ಯೊ
ವಂದವ್ಣ್ಯೊ ದವ್ಲತೆಚ್ಯೊ
ಲುಸಿಫೆರಾಚ್ಯಾ ಶಿಕಾರೆಚ್ಯೊ
ತ್ಯೊ ಕಿತ್ಲ್ಯಾ ಕಾಳಾಚ್ಯೊ?

ಜಾಗೊ ಜಾ ಭಾವಾ ನಿದ್ಲಲೊ
ಪಯ್ಶ್ಯಾಂಚ್ಯಾ ರಾಶಿಂತ್ಲೊ
ಆಸಾ ಎಕ್ಲೊ ಭಗ್ಶಿತಲೊ
ದಯ್ವಿಕ್ ದಾಯ್ಜ್ ದಿತಲೊ

ಆಶೆಚ್ಯೊ ನಶೆಚ್ಯೊ
ವಂದವ್ಣ್ಯೊ ಖುಶೆಚ್ಯೊ
ಸಯ್ತಾನಾಚ್ಯಾ ಮೊಸಾಂಚ್ಯೊ
ತ್ಯೊ ಕಿತ್ಲ್ಯಾ ದಿಸಾಂಚ್ಯೊ?

ಧಾಂವ್ ಮನ್ಶಾ ಪಾತ್ಕಾಂತ್ಲೊ
ಕಾಳಕಾಚ್ಯಾ ಕಾಮಾಂತ್ಲೊ
ಆಸಾ ಎಕ್ಲೊ ಭಗ್ಶಿತಲೊ
ಉಜ್ವಾಡ್ ಫಾಂಕಯ್ತಲೊ

ಪ್ರದ್ವಾರಾಚ್ಯೊ ವ್ಯಭಿಚಾರಾಚ್ಯೊ
ವಂದವ್ಣ್ಯೊಕುಡಿಚ್ಯೊ
ದೆಂವ್ಚಾರಾಚ್ಯಾ ನಾಡಿಂಚ್ಯೊ
ತ್ಯೊ ಕಿತ್ಲ್ಯಾ ಘಡಿಯಾಂಚ್ಯೊ?

ಉಟ್ ಭಾವಾ ಅಪ್ರಾಧಾಂತ್ಲೊ
ಪಾತ್ಕಾ ವರ್ವಿಂ ಮೆಲಲೊ
ಆಸಾ ಎಕ್ಲೊ ಭಗ್ಶಿತಲೊ
ನವೆಂ ಜಿವಿತ್ ದಿತಲೊ

- ಲ್ಯಾನ್ಸಿ ಕಾರ್ಡೊಜಾ ತಾಕೊಡೆ, ಅಲಂಗಾರ್