ಸೊಮ್ಯಾ ಸಂಗಿಂ ರಾಂವ್ಚೆಂ
ತಾಚ್ಯೆ ಸಂಗಿಂ ಜಿಯೆಂವ್ಚೆಂ
ಹಾ! ಭಾಗ್ ಕೆದೆಂ ವರ್ತೆಂ
ತರಿ ಅಮೆರಿಕಾ ವೆಚೆಂ
ಕೆನಡಾ ರಾಂವ್ಚೆಂ
ಜಾಲಾಂ ಚಡ್ ಗರ್ಜೆಚೆಂ!

ಪವಿತ್ರ್ ಪುಸ್ತಕ್ ವಾಚ್ಚೆಂ
ಸತ್ ಜಣಾ ಜಾಂವ್ಚೆಂ
ಹಾ! ಭಾಗ್ ಕಿತ್ಲೆಂ ವರ್ತೆಂ
ತರಿ ಪರ್ಗಾಂವಾಂತ್ ಶಿಕ್ಚೆಂ
ವಯ್ಲ್ಯಾನ್ PhD ಕರ್‍ಚೆಂ
ಜಾಲಾಂ ಆಜ್ ಮರ್ಜೆಚೆಂ!

ವಾಯ್ಟ್ ಪಯ್ಸ್‌ ಕರ್‍ಚೆಂ
ಜೆಜುಕ್ ಲಾಗಿಂ ಜಾಂವ್ಚೆಂ
ಹಾ! ದಾಯ್ಜ್ ಕೆದೆಂ ವರ್ತೆಂ
ತರಿ Dollar ಆಶೆಂವ್ಚೆಂ
ಕರೊಡ್ ಪುಂಜಾಂವ್ಚೆಂ
ಜಾಲಾಂ ದಿರ್ವೆಂ ಲೊಕಾಚೆಂ!

ಅಮರ್‌ಜಿವಿತ್ ಜೊಡ್ಚೆಂ
ಸರ್ಗಿಂ ಸುಖಾಕ್ ಪಾಂವ್ಚೆಂ
ಹಾ! ಭಾಗ್ ಕಿತ್ಲೆಂ ವರ್ತೆಂ
ತರಿ ಫಕತ್ ಸಂಸಾರಾಚೆಂ
ಜಿಣೆಂ ಚಾರ್ ದಿಸಾಂಚೆಂ
ಜಾಲಾಂ ಕಿತ್ಲೆಂ ಮೊಗಾಚೆಂ!

- ಲ್ಯಾನ್ಸಿ ಕಾರ್ಡೊಜಾ ತಾಕೊಡೆ - ಅಲಂಗಾರ್