ಆಮ್ಚೆಂ ಮಿಸಾಚೆಂ ಬಲಿದಾನ್, ಹೆರ್ ಮಾಗ್ಣಿಂ ಆನಿ ಕಾರ್ಯಕ್ರಮ ಪ್ರಾರಂಭ್ ಕರ್ತಾನಾ ಖುರ್ಸಾಚೊ ಘುರ್ತ್ ಕಾಡುನ್ ತ್ರಿಯೆಕ್ ದೇವ್ ಬಾಪಾಕ್ ಆನಿ ಪುತಾಕ್ ಆನಿ ಪವಿತ್ರ್ ಆತ್ಮ್ಯಾಕ್ ಉಲೊ ಕರ್ತಾಂವ್. ತರ್ ಹ್ಯಾ ತ್ರಿಯೆಕ್ ದೆವಾ ವಿಶ್ಯಾಂತ್ ದೆವಾಚಾ ಉತ್ರಾಂ ಮಾರಿಫಾತ್ ವಿವರ್ಸುಂಕ್ ಹ್ಯಾ ಲೇಖನಾಂತ್ ಹಾಂವ್ ಆಶೆತಾಂ.

ಆಮ್ಚ್ಯಾ ಪೂರ್ವಜಾಂನಿ ಆಮ್ಕಾಂ ಬಾಪಾಚೇ ಆನಿ ಪುತಾಚೇ ಆನಿ ಪವಿತ್ರ್ ಆತ್ಮ್ಯಾಚೆ ನಾಂವಿ ಮ್ಹಣೊನ್ ಖುರ್ಸಾಚೊ ಘುರ್ತ್ ಕಾಡುಂಕ್ ಶಿಕಯ್ಲಾಂ. ಬಾಪಾಚೇ ಮ್ಹಣ್ತಾನಾ ಕಪಲಾಚೆರ್ ಹಾತ್ ಲಾಯ್ತಾಂವ್. ತಶೆಂ ಮ್ಹಳ್ಯಾರ್ ಬಾಪ್ ಮ್ಹಜಾ ಮನಾಂತ್. ಬಾಪ್ ಜಾಣ್ವಾಯೆ ರುಪಾರ್ ಮ್ಹಜೆ ಥಂಯ್ ಬಿಡಾರ್ ಕರ್ನ್ ಆಸಾ. ಆನಿ ಪುತಾಚೇ ಮ್ಹಣ್ತಾನಾ ಕಾಳ್ಜಾಚೆರ್ ಹಾತ್ ಲಾಯ್ತಾಂವ್. ಪೂತ್ ಮೋಗ್, ಕಾಕುಳ್ತ್, ಕಣ್ವಳಾಯ್, ದಯಾಳಾಯ್, ಮೊವಾಳಾಯೆಚಾ ರುಪಾರ್ ಮ್ಹಜಾ ಕಾಳ್ಜಾಂತ್ ವಸ್ತಿ ಕರ್ನ್ ಆಸಾ. ಆನಿ ಪವಿತ್ರ್ ಆತ್ಮ್ಯಾಚೆ ನಾಂವಿ ಮ್ಹಣ್ತಾನಾ, ಆಮಿ ಭುಜಾಚೆರ್ ಹಾತ್ ಲಾಯ್ತಾಂವ್. ಪವಿತ್ರ್ ಆತ್ಮೊ ಜೆಂ ಕಿತೆಂ ಬಾಪಾನ್ ಸಾಂಗ್ಲಾ, ಪುತಾ ಥಂಯ್ ದೆಖ್ಲಾಂ, ತೆಂ ವ್ಹಯ್ ಮ್ಹಣೊನ್, ಪವಿತ್ರ್ ಆತ್ಮೊ ರುಜು ಕರ್ತಾ. ತೆ ತೆಗೀ ಏಕ್ ಜಾವ್ನ್ ಮ್ಹಜೆ ಥಂಯ್ ಬಿಡಾರ್ ಕರ್ನ್ ಆಸಾತ್.

ಆಮಿ ವಾಚ್ತಾಂವ್ ಉತ್ಪತ್ತಿ 1:26 ಆನಿ ದೆವಾನ್ ಮ್ಹಳೆಂ: "ಆಮ್ಚ್ಯಾಚ್ ರುಪಾಚೊ ಆನಿ ಆಮ್ಚ್ಯಾಚ್ ಸಾರ್ಕ್ಯಾಚೊ ಮ್ಹನ್ಯಾಕ್ ಆಮಿ ಕರುಂಯಾಂ." ಹಾಂಗಾಸರ್ 'ದೆವಾನ್' ಮ್ಹಳ್ಯಾರ್ ಎಕಾ ಖರ್‍ಯಾ ನಿಜಾ ದೆವಾನ್ ಮ್ಹಜ್ಯಾ ಸಾರ್ಕ್ಯಾಚೊ ಆನಿ ರುಪಾಚೊ ಮ್ಹಣ್ ಸಾಂಗೊಂಕ್ ನಾ, ಬಗಾರ್ ಆಮ್ಚ್ಯಾಚ್ ಸಾರ್ಕ್ಯಾಚೊ ಆನಿ ರುಪಾಚೊ ಏಕ್ ಮನಿಸ್ (ಆದಾಂವ್ಕ್) ರಚ್ಲೊ. ಆನಿ ಹೊ ಏಕ್ ಮನಿಸ್ ಬಾಪಾಚಾ ಆನಿ ಪುತಾಚಾ ಆನಿ ಪವಿತ್ರ್ ಆತ್ಮ್ಯಾಚಾ ಸಾರ್ಕ್ಯಾಚೊ ಆನಿ ರುಪಾಚೊ ಜಾವ್ನಾಸಾ. ದೆಕುನ್ ತೆಗೀ ಜಣ್ ಏಕ್ ಜಾವ್ನ್ ಎಕಾ ಮನ್ಶ್ಯಾ ಥಂಯ್ ಬಿಡಾರ್ ಕರ್ನ್ ಆಸಾತ್.

ತರ್ ದೇವ್ ಕೋಣ್? ದೇವ್ ಆಸಾ ಆನಿ ದೇವ್ ಸುರ್ವೆರ್ ಥಾವ್ನ್‌ಚ್ಚ್ ಆಸ್‌ಲ್ಲೊ. ಆಮಿ ವಾಚ್ತಾಂವ್ ಜುವಾಂವ್ 1:1 "ವೆಳಾ ಕಾಳಾ ಪುರ್ವಿಂ ಸಬ್ದ್ ಆಸ್ಲೊ, ಸಬ್ದ್ ದೇವ್ ಜಾವ್ನಾಸ್‌ಲ್ಲೊ." 'ಸಬ್ದ್' ಮ್ಹಳ್ಯಾರ್ ಆವಾಜ್, ಅಕ್ಷರ್ ಯಾ ಭಾಸ್ ನ್ಹಂಯ್. ಸಬ್ದ್ ಮ್ಹಳ್ಯಾರ್ ಸಂದೇಶ್, ದೆವಾಚೆಂ ಉತಾರ್ (ಜುವಾಂವ್ಚೆ ಪಯ್ಲೆಂ ಪತ್ರ್ 1:5). ಸಬ್ದ್ ಜಾವ್ನಾಸಾ ದೆವಾಚಿ ಬರಿ ಖಬರ್ (ಲೂಕ್ 2:10)

"ಕೊಣೆಂಯೀ ದೆವಾಕ್ ಕೆದಿಂಚ್ ಪಳೆಲ್ಲೊ ನಾ." (ಜುವಾಂವ್ 1:18) ಕಿತ್ಯಾಕ್ ಮ್ಹಳ್ಯಾರ್ ದೇವ್ ಆತ್ಮೊ ಜಾವ್ನಾಸಾ (ಜುವಾಂವ್ 4:24), "ದೇವ್ ಆಮ್ಚೆಲಾಗಿಂ ಪ್ರವಾದ್ಯಾ ಮುಖಾಂತ್ರ್ ಆನಿ ಆಪ್ಲ್ಯಾ ಪುತಾ ಜೆಜು ಮಾರಿಫಾತ್ ಉಲೈಲಾ." (ಹೆಬ್ರೆವ್ 1:1) ಆಮಿ ತಾಚೊ ತಾಳೊ ಮಾತ್ರ್ ಆಯ್ಕಾತಾಂವ್. ದೇವ್ ಮೊಯ್ಜೆಕ್ ಜಳ್ಚ್ಯಾ ಝಿಲ್ಕುಟಾ ಮಧೆಂ ಥಾವ್ನ್ ಉಲೊ ಕರ್ತಾ. "ಹಾಂಗಾ ಲಾಗಿಂ ಸರನಾಕಾ! ತುಜ್ಯಾ ಪಾಂಯಾಚ್ಯೊ ವ್ಹಾಣೊ ಕಾಡ್. ಕಿತ್ಯಾಕ್ ತುಂ ಉಬೊ ಆಸಾಯ್ ತೊ ಜಾಗೊ ಪವಿತ್ರ್." (ನಿರ್ಗಮನ್ 3:5)

ಜೆಜುಚೆಂ ಪವಿತ್ರ್‌ಸ್ನಾನ್ (ಮಾತೆವ್ 3:17) ಆನಿ ರುಪಾಂತರ್ (ಮಾರ್ಕ್ 9:17) ವೆಳಾ "ಹೊ ಮ್ಹಜೊ ಮೊಗಾಚೊ ಪೂತ್" ಮ್ಹಣೊನ್ ದೆವಾಚೊ ತಾಳೊ ಆಯ್ಕಾಲೊ.

ಭೋವ್ ಪವಿತ್ರ್ ತ್ರಿಂದಾದಿಚೊ ದುಸ್ರೊ ಸಾಂದೊ ಜಾವ್ನಾಸಾ ಜೆಜು. ಜೆಜು ದೆವಾಚೊ ಪೂತ್. "ಆನಿ ಸಬ್ದ್ (ದೇವ್) ಮ್ಹನಿಸ್ ಜಾಲೊ ಆನಿ ಆಮ್ಚೆ ಮಧೆಂ ಜಿಯೆಲೊ." (ಜುವಾಂವ್ 1:14) ಜೆಜು ಫಿಲಿಪಾಕ್ ಸಾಂಗ್ತಾ "ಜಾಣೆಂ ಮ್ಹಾಕಾ ಪಳೆಲಾ, ತಾಣೆಂ ಬಾಪಾಕ್‌ಯೀ ಪಳೆಲಾ, ಹಾಂವ್ ಬಾಪಾ ಸವೆಂ ಆಸಾಂ ಆನಿ ಬಾಪ್ ಮ್ಹಜಾ ಸವೆಂ ಆಸಾ." (ಜುವಾಂವ್ 10:30) ಬಾಪಾಚಿ ಸಂಪೂರ್ಣತಾ ಜೆಜು ಥಂಯ್ ಹಾಜರ್ ಆಸಾ. ಜಶೆಂ ಬಾಪ್ ತಶೆಂ ಪೂತ್.

"ಆನಿ ತಾಕಾ 'ಇಮ್ಮಾನುಎಲ್' ಮ್ಹಣುನ್ ಆಪಯ್ತಲೆ." 'ಇಮ್ಮಾನುಎಲ್' ಮ್ಹಳ್ಯಾರ್ 'ದೇವ್ ಆಮ್ಚೇ ಸಾಂಗಾತಾ' ಮ್ಹಣ್ ಅರ್ಥ್. (ಮಾತೆವ್ 1:23). ಬಾಪಾಚೆಂ ಸೈಂಭ್, ವ್ಯಕ್ತಿತ್ವ್, ಸ್ವಭಾವ್ ಜೆಜು ಥಂಯ್ ದಿಸೊನ್ ಯೆತಾ. ಸಾಂ. ಪಾವ್ಲ್ ಕೊಲೊಸ್ಸೆಗಾರಾಂಕ್ ಆಪ್ಲ್ಯಾ ಪತ್ರಾಂತ್ ಬೊರೈತಾ "ಜೆಜು ಪ್ರತಿರೂಪ್ ಅದೃಶ್ಯ್ ದೆವಾಚೆಂ" (1:15) ಜೆಜು ದಿಸನಾತ್‌ಲ್ಲ್ಯಾ ದೆವಾಚೆಂ ಪ್ರತಿರೂಪ್ ಜಾವ್ನಾಸಾ. "ಆನಿ ಜೆಜು ಥಂಯ್ ಮಾತ್ರ್ ಸಗ್ಳಿ ದೈವಿಕ್ ಸಂಪೂರ್ಣತಾ ಸಾಕ್ಷಾತ್ ಥರಾನ್ ಬಿಡರ್ ಕರ್‍ತಾ." (2:9)

ಜೆಜು ಬಾಪಾಚಾ ಗೊಪಾಂತ್ ಆಸಾ. ತ್ಯಾ ದೆಕುನ್ ತಾಣೆಂ ಮಾತ್ರ್ ದೆವಾಕ್ ಪಳೆಲಾಂ ಆನಿ ಆಮ್ಕಾಂ ಬಾಪಾಚಿ ಖರಿ ಒಳಕ್ ಕರ್ನ್ ದಿಲ್ಯಾ (ಜುವಾಂವ್ 1:18) ಜೆಜು ಬಾಪಾ ಸರ್ಶಿಂ ವೆಚಿ ವಾಟ್ ಜಾವ್ನಾಸಾ. (ಜುವಾಂವ್ ೧೪:೬) ಅಶೆಂ ಬಾಪ್ ಆನಿ ಪೂತ್ ಎಕ್‌ಚ್ಚ್ ಆನಿ ತೆ ಎಕ್ವಟಾಂತ್ ಆಸಾತ್.

ಭೋವ್ ಪವಿತ್ರ್ ತ್ರಿದಾಂದಿಚೊ ತಿಸ್ರೊ ಸಾಂದೊ ಜಾವ್ನಾಸಾ ಪವಿತ್ರ್ ಆತ್ಮೊ. ಸಂಸಾರಾಚಾ ಆರಂಭಾಕ್ ದೈವಿಕ್ ವಾರೆಂ ಉದ್ಕಾಚೆರ್ ಮಾರ್‍ತೆಲೆಂ (ಉತ್ಪತ್ತಿ 1:1) ಹೆಂ ದೈವಿಕ್ ವಾರೆಂ ಜಾವ್ನಾಸಾ ದೆವಾಚೊಚ್ಚ್ ಆತ್ಮೊ, ಶ್ವಾಸ್, ಧೈರ್ಯ್ ಆನಿ ಬಳ್. ಅತ್ಮೊ ಜಾವ್ನಾಸಾ ದೆವಾಚೆಂ ಅನೇಕ್ ರೂಪ್ (ಜುವಾಂವ್ 4:24) ಜೆಜು ಪವಿತ್ರ್ ಆತ್ಮ್ಯಾನ್ ಭರ್‌ಲ್ಲೊ.

"ಪೆಂತೆಕೊಸ್ತಾಚೇ ಪರ್ಬೆಚಾ ದಿಸಾ ಪವಿತ್ರ್ ಆತ್ಮೊ ಉಜ್ಯಾ ಸಾರ್ಕ್ಯೊ ಜಿಬೆ ಬರಿ ಯೇವ್ನ್ ತಾಂಚೇ ಮಧ್ಲ್ಯಾ ಹರ್‍ಯೆಕ್ಲ್ಯಾಚೆರ್ ವಚುನ್ ರಾವ್ಲೊ. ತೆ ಸಮೆಸ್ತ್ ಪವಿತ್ರ್ ಆತ್ಮ್ಯಾನ್ ಭರ್‍ಲೆ" (ಧರ್ಮ್‌ದೂತಾಚಿಂ ಕೃತ್ಯಾಂ 2:3,4) ಜೆಜುಚೆ ಬಾರಾ ಜಣ್ ಧರ್ಮ್‌ದೂತ್ ದೆವಾ ಥಾವ್ನ್ ಆಯಿಲ್ಲ್ಯಾ ಪವಿತ್ರ್ ಆತ್ಮ್ಯಾನ್ ಭರ್‍ಲೆ ಆನಿ ತ್ಯಾ ಆತ್ಮ್ಯಾನ್ ತಾಂಕಾ ವಾಚಾ ಸಕತ್ ದಿಲಿ. (ಧರ್ಮ್‌ದೂತಾಂಚಿ ಕೃತ್ಯಾಂ 2:4) ಪವಿತ್ರ್ ಆತ್ಮ್ಯಾನ್ ಆನಿ ಜಾಣ್ವಾಯೆನ್ ಭರ್‌ಲ್ಲೊ ಪೆದ್ರು, ಜುದೆವ್ ಭಾವಾಂಕ್ ಆನಿ ಜೆರುಜಲೆಮಾಚ್ಯಾ ನಿವಾಸ್ಯಾಂಕ್ ವ್ಹಡ್ಲ್ಯಾ ತಾಳ್ಯಾನ್ ಶಿಕೊವ್ಣ್ ದೀಂವ್ಕ್ ಸಕ್ಲೊ (ಧರ್ಮ್‌ದೂತಾಂಚಿ ಕೃತ್ಯಾಂ 2:14). ಪವಿತ್ರ್ ಆತ್ಮ್ಯಾನ್ ಆನಿ ಜಾಣ್ವಾಯೆನ್ ಭರ್‌ಲ್ಲೊ ಸ್ತೆಫಾನ್ ಲೊಕಾಂ ಮಧೆಂ ವ್ಹಡ್ ವ್ಹಡ್ ಅಚರ್ಯಾಂ, ಖುಣಾ ದಾಖೊಂವ್ಕ್ ಲಾಗ್ಲೊ ಆನಿ ಧೈರ್ಯಾನ್ ಉಲೊವ್ಕ್ ಲಾಗ್ಲೊ (ಧರ್ಮ್‌ದೂತಾಂಚಿ ಕೃತ್ಯಾಂ 6:8,10) ತ್ಯಾ ದೆಕುನ್ ಪವಿತ್ರ್ ಆತ್ಮೊ ಆಮ್ಚೆರ್ ಆಯಿಲ್ಲ್ಯಾ ವೆಳಾರ್ ಆಮಿ ಜಾಣ್ವಾಯೆನ್, ಧೈರ್ಯಾನ್, ಬಳಾನ್ ಆನಿ ಸಮ್ಜೊಣೆನ್ ಭರ್ತಾಂವ್ (ಇಜಾಯಿಯಾ 11:2)

ಥೊಡ್ಯಾ ದಾಖ್ಲ್ಯಾ ಮುಖಾಂತ್ರ್ ಬಾಪ್, ಪೂತ್ ಆನಿ ಪವಿತ್ರ್ ಆತ್ಮೊ ಎಕ್ವಟಾಂತ್ ಆಸಾತ್, ತಾಂಕಾ ವಿಂಗಡ್ ಕರುಂವ್ಕ್ ಜಾಯ್ನಾ, ತೆ ಏಕ್ ಜಾವ್ನಾಸಾತ್ ಮ್ಹಣೊನ್ ಸಮ್ಜೊನ್ ಘೆವ್ಯಾಂ.

1. ಸುರ್ಯೊ ಆಸಾ, ಸುರ್ಯಾ ಥಾವ್ನ್ ವೊತ್ ಆನಿ ಗರ್ಮಿ (ಧಗ್) ಭಾಯ್ರ್ ಸರ್‍ತಾ. ವೊತ್ ಆನಿ ಗರ್ಮಿ ಸುರ್ಯಾ ಥಾವ್ನ್ ವಿಂಗಡ್ ಕರುಂವ್ಕ್ ಜಾಯ್ನಾ. ತಿನೀ ಎಕ್ವಟಾಂತ್ ಆಸಾತ್.

2. ಉದಾಕ್ ಆಸಾ (ದ್ರವ ರೂಪ್) ಡೀಪ್ ಪ್ರಿಝಾರಾಂತ್ ದವರ್ಲ್ಯಾರ್ ಭರ್ಪ್ (ಐಸ್) ಜಾತಾ (ಘನರೂಪ) ಉದಾಕ್ ಉಜ್ಯಾರ್ ದವರ್ನ್ ಸಳ್ಸಳುಂಕ್ ಸೊಡ್ಮ್ಯಾರ್ ಆವಿ ಜಾತಾ (ಅನಿಲ ರೂಪ್) ಉದ್ಕಾ ಥಾವ್ನ್ ಐಸ್ ಆನಿ ಆವಿ ಜಾತಾ ಆನಿ ತಾಂಚೆ ಗೂಣ್ ಏಕ್ ಜಾವ್ನಾಸಾತ್.

3. ಜೆಜುಚಾ ಪವಿತ್ರ್ ಸ್ನಾನಾ ವೆಳಾ (ಮಾತೆವ್ 3:16,17) ಬಾಪಾಚೊ ತಾಳೊ ಆಯ್ಕಾತಾಂವ್ "ಹೊ ಮ್ಹಜೊ ಮೊಗಾಚೊ ಪೂತ್" ಬಾಪ್ ಜೆಜುಕ್ ಮ್ಹಜೊ ಮೊಗಾಚೊ ಪೂತ್ ಮ್ಹಣೊನ್ ಉಲೊ ಕರ್ತಾ. ಜೆಜು ಯೋರ್ದಾನ್ ನ್ಹಂಯ್ ತಡಿರ್ ರೂಪ್ ರೂಪ್ ಉಬೊ ಆಸ್‌ಲ್ಲೊ ದಿಸ್ತಾ. ಆನಿ ದೆವಾಚೊ ಪವಿತ್ರ್ ಆತ್ಮೊ ಸರ್ಗಾ ಥಾವ್ನ್ ಜೆಜುಚೆರ್ ದೆಂವ್ಲೊ. ಬಾಪಾ ಥಾವ್ನ್ಂಚ್ ಭಾಯ್ರ್ ಸರ್ನ್ ಜೆಜು ಆಯ್ಲಾ (ಜುವಾಂವ್ 16:28). ತಶೆಂಚ್ ಬಾಪಾ ಥಾವ್ನ್ಂಚ್ ಪವಿತ್ರ್ ಆತ್ಮೊ ಆಯ್ಲಾ (ಜುವಾಂವ್ 15:26). ಅಶೆಂ ಬಾಪ್‌ಚ್ಚ್ ಆತ್ಮೊ, ಬಾಪ್ ಆನಿ ಜೆಜು ಏಕ್ ಜಾಲ್ಲ್ಯಾ ವರ್ವಿಂ ಜೆಜು ಜಾವ್ನಾಸಾ ಆತ್ಮೊ, ಪೂಣ್ ಮನ್ಯಾ ರುಪಾರ್ ಸಾಂಸಾರಾಂತ್ ಆಯ್ಲೊ (ಫಿಲಿಪ್ಪಿಗಾರಾಂಕ್ 2:8). ತ್ಯಾ ದೆಕುನ್ ತೆ ತೆಗೀ ಏಕ್ ಜಾವ್ನಾಸಾತ್. ತಾಂಚೆ ಸೈಂಭ್, ಗೂಣ್ ಎಕ್ ಜಾವ್ನಾಸಾತ್.

ತ್ಯಾ ದೆಕುನ್ ಪುನರ್‌ಜಿವಂತ್ ಜಾಲ್ಲೊ ಜೆಜು ಆಪ್ಲ್ಯಾ ಇಕ್ರಾ ಶಿಸಾಂಕ್ ಸಾಂಗ್ತಾ ವಚಾ ಆನಿ ಸಮೇಸ್ತ್ ಪರ್ಜಾಂಚೆ ಶಿಸ್ ಕರಾ. ಬಾಪಾಚೇ ಆನಿ ಪುತಾಚೇ ಆನಿ ಪವಿತ್ರ್ ಆತ್ಮ್ಯಾಚೆ ನಾಂವಿ ತಾಂಕಾ ಪವಿತ್ರ್ ಸ್ನಾನ್ ದಿಯಾ. (ಮಾತೆವ್ 28:19,20)

ಆನಿ ನಿಮಾಣೆ ಏಕ್ ಉತಾರ್ - ಆಮ್ಕಾಂ ತ್ರಿಯೆಕ್ ದೆವಾ ವಿಶ್ಯಾಂತ್ ಆನಿಕೀ ಗೂಂಡಾಯೆನ್ ಸಮ್ಜಣಿ, ಉಜ್ವಾಡ್ ಜಾಯ್ ಜಾಲ್ಯಾರ್ ಆನಿ ಪವಿತ್ರ್ ಆತ್ಮ್ಯಾಚೆಂ ದೆಣೆಂ ಜೊಡುಂಕ್ ಜಾಯ್. ಜೆಜು ಸಾಂಗ್ತಾ ಸತಾಚೊ ಪವಿತ್ ಆತ್ಮೊ ಮ್ಹಳ್ಯಾರ್ ದೆವಾಚೊ ಪವಿತ್ರ್ ಆತ್ಮೊ ಆಯ್ಲಾಲ್ಯಾ ವೆಳಾರ್ ತುಮ್ಕಾಂ ತೊ ಸಂಪೂರ್ಣ್ ಸತಾಕ್ ವ್ಹರ್ನ್ ಪಾಯ್ತಲೊ (ಜುವಾಂವ್ 16:13)

ಅಶೆಂ ತ್ರಿಯೆಕ್ ದೇವ್ ಆಮ್ಚ್ಯಾ ಭಾವಾಡ್ತಾಚೆಂ ಸತ್ ಆನಿ ಜಿವಿತ್ ಜಾವ್ನಾಸಾತ್.

- Cyprian Lewis, Sastan

Add comment


Security code
Refresh

PRAYER REQUEST

Send your Prayer Request to [email protected]

or

Mob: +91-9845391050

ONE IN CHRIST

TESTIMONIALS

ಶೆಕಿಂ ಪುಣ್‌ಯಿ ಬೂದ್ ಯೆಂವ್ ಬರಿ

Sheki puni

WHO IS ONLINE

We have 185 guests and no members online

FOUNDER/ DIRECTOR

FrJerrySequeira

MISSION MEDIA

UPCOMING EVENTS

One Day Retreat

Saturday One Day Retreat
Sat Aug 30 @ 8:00AM - 04:00PM
Thursday One Day Retreat
Thu Sep 04 @ 8:00AM - 04:00PM
Friday One Day Retreat
Fri Sep 05 @ 8:00AM - 04:00PM

Residential Retreat

September 2025 - Residential Retreat
Sun Sep 14 @ 5:30PM - Thu Sep 18 @ 2:00PM
October 2025 - Growth Retreat
Sun Oct 19 @ 5:30PM - Thu Oct 23 @ 2:00PM
November 2025 - Residential Retreat
Sun Nov 09 @ 5:30PM - Thu Nov 13 @ 2:00PM

ಜೆಜು ತುಂ ಮ್ಹಜೊ ಆನಿ ಹಾಂವ್ ತುಜೊ

Kon