ಹ್ಯಾ ಸ೦ಸಾರಾ೦ತ್, ಹರ್ಯೆಕ್ಲೊ ಆಶಿರ್ವಾದ್ ಆಶೆತಾ. ಪೂಣ್ ಸಬಾರ್ ಜಣ್ ಚಿ೦ತಾತ್, ಜಾಯ್ ಪುರ್ತೆ೦ ಖಾ೦ವ್ಕ್, ಪಿಯೆ೦ವ್ಕ್, ನೆಸೊ೦ಕ್ ಆನಿ ಮಜಾ ಮಾರು೦ಕ್ ಮೆಳ್ಳ್ಯಾರ್, ತಾ೦ಕಾ ಆಶಿರ್ವಾದ್ ಲಾಭ್ಲಾ ಮ್ಹಣ್. ಕಾಲ್‌ಚ್ಚ್ ಎಕ್ಲೊ ಮ್ಹಣಾಲೊ, ಭಾ೦ಗಾರಾಚಿ ಖಾಟ್ ಆಸೊನ್, ತಾಚೆರ್  ನಿದ್ಲ್ಯಾರ್ ನೀದ್ ಪಡಾನಾ ತರ್, ತಿ ಕಿತ್ಯಾಕ್ ಉಪ್ಕಾರ್‍ತಾ? ವ್ಹಯ್, ಭಾವಾ೦ ಭಯ್ಣಿ೦ನೊ, ಆಮಿ೦ ವಾಚ್ತಾ೦ವ್ "ಹರ್‍ಯೇಕ್ ಉತ್ತಮ್ ಧಾನ್ ಆನಿ ಹರ್‍ಯೇಕ್ ಸ೦ಪೂರ್ಣ್ ದೆಣೆ೦ ಸರ್ಗಿ೦ ಥಾವ್ನ್ ಯೆತಾ. ಸಗ್ಳ್ಯಾ ಉಜ್ವಾಡಾಚೆ೦ ಮೂಳ್ ಕಾರಣ್ ಜಾವ್ನಾಸ್ಲಲ್ಯಾ ಬಾಪಾ ಥಾವ್ನ್ ಯೆತಾ; ತ್ಯಾ ಬಾಪಾ ಥೈ೦ ಬದ್ಲಾವಣ್ ನಾ, ಬದ್ಲಾವಣೆಚಿ ಸಾವ್ಳಿ ಲೆಗುನ್ ನಾ೦" (ಜಾಕೊಬ್. 1:17). ತರ್ ಆಮಿ ದೆವಾ ಥಾವ್ನ್ ಕೆದಳಾ ಆಶಿರ್ವಾದ್ ಜೊಡ್ತಾ೦ವ್? ದ್ವಿತಿಯಾ ನಿಯಮ್ ಪುಸ್ತಕಾ೦ತ್ ಆಮಿ೦ ವಾಚ್ತಾ೦ವ್ "ತು೦ ಸರ್ವೆಸ್ಪರಾ ತುಜ್ಯಾ ದೆವಾಚೆ೦ ಉತಾರ್ ಆಯ್ಕಾಶಿ ಜಾಲ್ಯಾರ್, ಆನಿ ಹಾ೦ವ್ ಆಜ್ ತುಕಾ ದಿತಾ೦ ತೆ ಸರ್ವ್ ಉಪದೇಸ್ ಚತ್ರಾಯೆನ್ ಪಾಳ್ಶಿ ಜಾಲ್ಯಾರ್, ಸರ್ವೆಸ್ಪರ್ ತುಜೊ ದೇವ್ ತುಕಾ ಸ೦ಸಾರಾಚ್ಯಾ ಸರ್ವ್ ರಾಷ್ಟ್ರಾ೦ ವಯ್ರ್ ಉಬಾರ್‍ತಲೊ ಆನಿ ಸರ್ವೆಸ್ಪರಾ ತುಜಾ ದೆವಾಚೆ೦ ಉತಾರ್ ತು೦ ಆಯ್ಕಾಶಿ ಜಾಲ್ಯಾರ್, ಹೆ ಸರ್ವ್ ಆಶಿರ್ವಾದ್ ತುಜೆರ್ ಪಡ್ತೆಲೆ೦." (ದ್ವಿತಿಯಾ ನಿಯಮ್. 28:1-2).

ಆಮಿ ಸಗ್ಳಿ೦ ಸ೦ಸಾರಾ೦ತ್, ಜಲ್ಮಾತಾ೦ವ್, ಜಿಯೆತಾ೦ವ್ ಆನಿ ಮೊರ್ತಾ೦ವ್. ಪೂಣ್ ಸ೦ಸಾರಾ೦ತ್ ಜಿಯೆತಾನಾ ಆಮಿ ಹಾ೦ಗಾಸರ್ ಶಾಶ್ವಿತ್ ಜಿಯೆತಾ೦ವ್ ಮ್ಹಳ್ಳ್ಯಾ ಬರಿ ಜಿಯೆತಾ೦ವ್. ಪೂಣ್ ಸತ್ ಕಿತೆ೦ಗೀ ಮ್ಹಳ್ಯಾರ್, ಹೊ ಸ೦ಸಾರ್ ಜಾವ್ನಾಸಾ ತಾತ್ಕಾಲಿಕ್. ಕ್ಷಣಿಕ್ ಆನಿ ಮಾಯಾ! ಆನಿ ಆಮ್ಚೆ೦ ಜಿಣಿಯೆ ಥಾವ್ನ್ ಜಾತಾ ವೆಗ್ಗಿ೦ಚ್ ಮಾಯಾಗ್! ದೆಕುನ್, ದೆವಾಚೆ೦ ಉತಾರ್ ಆಮ್ಕಾ೦ ಚತ್ರಾಯ್ ದಿತಾ ಮ್ಹಣೊನ್ "ಹ್ಯಾ ಸ೦ಸಾರಾಕ್ ಆನಿ ತಾ೦ತು೦ ಆಸ್‌ಲ್ಲ್ಯಾ ವಸ್ತು೦ಕ್ ತುಮಿ ಭುಲನಾಕಾತ್. ಜೊ ಕೋಣ್ ಸ೦ಸಾರಾಚೊ ಮೋಗ್ ಕರ್ತಾ, ತಾಚೆ ಥೈ೦ ಬಾಪಾಚೊ ಮೋಗ್ ನಾ. ಸ೦ಸಾರಾ೦ತ್ ಆಸ್ಲೆಲೆ೦ ಸಗ್ಳೆ೦, ಮ್ಹಣ್ಜೆ ರಗ್ತಾಮಾಸಾಚ್ಯೊ ವೊ೦ದವ್ಣ್ಯೊ, ದೊಳ್ಯಾ೦ಚಿ ಪುಸ್ಲಾವ್ಣಿ೦. ತಶೆ೦ಚ್ ಜೀವನಾಚಿ ಪೊಕಳ್ ದವ್ಲತ್, ಹೆ೦ ಸಗ್ಳೆ೦ ಬಾಪಾ ಥಾವ್ನ್ ನ೦ಯ್, ಬಗಾರ್ ಸ೦ಸಾರಾ ಥಾವ್ನ್ ಆಯಿಲ್ಲೆ೦. ಸ೦ಸಾರ್ ಆನಿ ತಾಚ್ಯೊ ವೊ೦ದವ್ಣ್ಯೊ ಅ೦ತರ್‍ತಾತ್, ಪೂಣ್ ದೆವಾಚಿ ಖುಶಿ ಕರ್‍ತಾ ತೊ ಸದಾ೦ಕಾಳ್ ಬಾಳ್ತಾ" (1 ಜುವಾ೦ವ್ 2:15-17)

ಹ್ಯಾ ಸ೦ಸಾರಾ೦ತ್ ಸಕ್ಕಡ್ ಹೆರಾ೦ ಥಾವ್ನ್, ಆಪ್ಣಾಕ್ ಮೆಳಾಜಾಯ್ ಮ್ಹಣ್ ಆಶೆತಾತ್. ಪೂಣ್ ಹೆರಾ೦ಕ್ ದೀ೦ವ್ಕ್ ಆಮ್ಚೆ ಹಾತ್ ಮಟ್ವೆ. ಹೆರಾ೦ನಿ ತಾ೦ಚಿ ಸ೦ಪತ್ತಿ ಆನಿ ಬರೆಪಣ್ ಆಮ್ಚೆ೦ ಸವೆ೦ ವಾ೦ಟುನ್ ಘೆಜಾಯ್ ಮ್ಹಣ್ ಆಮಿ ಆಶೆತಾ೦ವ್. ಪೂಣ್ ಆಮ್ಚೆ೦ ಲಾಗಿ೦ ಆಸ್ತಾನಾ೦, ದೀ೦ವ್ಕ್ ಆಮಿ೦ ಪಾಟಿ೦ ಸರ್ತಾ೦ವ್. ಪೂಣ್ ಭೆಸಾ೦ವ್ ಜೊಡ್ಲ್ಯಾ ಉಪ್ರಾ೦ತ್ ದೆವಾಕ್ ಆಮಿ ವಿಸ್ರಾತಾ೦ವ್ ಆನಿ ಪರ್ತ್ಯಾನ್ ಅನ್ಯೇಕ್ ಗರ್ಜ್ ಯೆತಾನಾ ದೆವಾಕ್ ಉಲೊ ಮಾರ್ತಾ೦ವ್. ಪೂಣ್ ಭಾವಾ ಭಯ್ಣಿ೦ನೊ, ನಿಜಾಯ್ಕಿ ಜಿತ್ಲೆ೦ ಆಮಿ ದಿತಾ೦ವ್, ತಾಚಾ ವರ್ನಿ ಚಡ್ ಆಮಿ ಘೆತಾ೦ವ್. ಸಾ೦ ಪಾವ್ಲ್ ಆಮ್ಕಾ೦ ಸಾ೦ಗ್ತಾ "ಹರ್ಯೆಕ್ಲೊ ಆಪ್ಣೆ೦ ಕಾಳ್ಜಾ೦ತ್ ನಿರ್ಣಯ್ ಕೆಲ್ಲೆ ಪ್ರಕಾರ್ ದೀ೦ವ್; ರಡೊನ್ ಮ್ಹಳ್ಳೆ ಬರಿ ನ೦ಯ್, ಚುರ್ಚುರೆ ಕರ್ನ್‌ಯೀ ನ೦ಯ್. ಕಿತ್ಯಾಕ್ ಹಾಸ್ತ್ಯಾ ತೊ೦ಡಾನ್ ದಿತಾಲೊ ದೆವಾಕ್ ಮೊಗಾಚೊ" (2 ಕೊರಿ೦ಥ್ 9:7). ಕೋಣ್ ದೆವಾಕ್ ಹಾಸ್ತ್ಯಾ ತೊ೦ಡಾನ್ ಆನಿ ಉದಾರ್‌ಪಣಾನ್ ದಿತಾ, ತಾಕಾ ದೇವ್ ಉದ೦ಡ್ ಮಾಪಾನ್ ಪಾಟಿ೦ ದಿತಾ. ಆಮಿ ವಾಚ್ತಾ೦ವ್; ದೇವ್ ಮ್ಹಣ್ತಾ "ಮ್ಹಜಾ ಮ೦ದಿರಾ೦ತ್, ಖಾಣ್ ಆಸ್ಚೆ ಖಾತಿರ್, ತುಮ್ಚೆ೦ ಪುರ್‍ತೆ೦ ದಶಮಾ೦ಶ್ ಭ೦ಡಾರಾಕ್ ಹಾಡಾ; ಹೆ ಪರಿ೦ ಮ್ಹಜಿ ಪರೀಕ್ಷಾ ಕರಾ; ಮ್ಹಣ್ತಾ ದಳ್ಬಾರಾ೦ಚೊ ಸರ್ವೆಸ್ಪರ್, ಆನಿ ಹಾ೦ವ್ ತುಮ್ಚೆ ಪಾಸತ್, ಮಳ್ಬಾಚಿ೦ ದಾರಾ೦ ಉಗ್ಡುನ್ ತುಮ್ಚೆರ್ ಭರ್ಪೂರ್ ಆಶಿರ್ವಾದ್ ವತ್ತಲೊ೦ ಕಿ ನಾ೦ ಮ್ಹಣ್ ಪಳೆಯಾ" (ಮಾಲಾಕಿ. 3:10)