ಆಮ್ಚಿಂ ಕ್ರಿಸ್ತಾಂವಾಂಚಿಂ ಸಬಾರ್ ಕಾರ್ಯಿಂ ಹೊಟೆಲಾಚ್ಯಾ ಹೊಲಾ ಭಿತರ್ ಜಾತಾನಾ, ಕಾರ್ಯೆಂ ಸುರು ಜಾಂವ್ಚ್ಯೆ ಪಯ್ಲೆಂಚ್ ಒಪನ್ ಬಾರ್ ಸರ್ವಾಂಕ್ ಸ್ವಾಗತ್ ಕರ್ತಾ. ಆಪಾಪ್ಲ್ಯಾ ಮನಾ ಪಸಂದೆಚೆಂ ಪೀವನ್ ಪಿಯೆಂವ್ಕ್ ಉಲೊ ಆಸ್ತಾ. ಸಯ್ರ್ಯಾಂನಿ ಹೊಲಾ ಭಿತರ್ ಆಯ್ಲಲೆಂಚ್ ಆಮಾಲ್ ಪಿಯೆಂವ್ಚೆಂ ಆನಿ ತಾಚ್ಯೆ ಸಂಗಿಂ ಜೆವ್ಣಾ ಪ್ರಾಸ್ ಚಡ್ ಸ್ಟಾರ್ಟರ್ಸ್ (Starters) ಖಾಂವ್ಚೆಂ ನವೆಂ ಟ್ರೆಂಡ್ (Trend) ಸುರು ಜಾಲಾಂ!
ಆಮಂತ್ರಣ್ ಪತ್ರಾಚೆರ್ ಏಕ್ ವೇಳ್, ಕಾರ್ಯೆಂ ಸುರು ಕರ್ಚೊ ಆನ್ಯೆಕ್ ವೇಳ್! ಉಪ್ರಾಂತ್ ನಾಂವಾ ತೆಕಿದ್ ದೆವಾಚೆಂ ಉತರ್ ಆನಿ ಕಂತಾರ್, ಪೂಣ್ ಬಗ್ಲೆನ್ ಮುಕಾರ್ ಒಪನ್ ಬಾರ್! ಹೊಲಾಂತ್ ವೆದಿಚೆರ್ ಯಾಜಕಾನ್ ದೆವಾಚೆಂ ಉತರ್ ವಾಚ್ತಾನಾಂಯ್ ಥೊಡ್ಯಾ ಸಯ್ರ್ಯಾಂನಿ ಸೊರ್ಯಾಚೆ ಆನಿ ಬಿಯರಾಚೆ ಗ್ಲಾಸ್ ಘೆವ್ನ್ ಆಸ್ಚೆಂ ಪಳೆಂವ್ಕ್ ಜಾಯ್ನಾ. ಹರೆಕಾ ಕಾಮಾಕ್ ಏಕ್ ವೇಳ್ ಆಸಾ (ಉಪದೇಶಕ್ 3:1). ಅಕ್ರಿಸ್ತಾಂವಾಂ ಆಮ್ಚ್ಯಾ ಕಾರ್ಯಾಂಕ್ ಯೆತಿತ್ ತರ್ ಆನಿ ಸೊರ್ಯಾಚ್ಯಾ ಗ್ಲಾಸಾ ಸಂಗಿಂ ಮಾಗ್ಣೆಂ ಕರ್ಚೆಂ ಪಳೆತಿತ್ ತರ್ ಖಂಡಿತ್ ಶಿರಿಂ ಚುಕುನ್ ಪಡ್ತಿತ್! ಖಂಯ್ ಪಾವ್ಲಾ ಆಮ್ಚೊ ಸಮುದಾಯ್?
ಚಡಾವತ್ ಕ್ರಿಸ್ತಾಂವಾಂ ಥಂಯ್ ಆಸ್ಚೊ ಆನ್ಯೆಕ್ ಗೂಣ್ ಮ್ಹಳ್ಯಾರ್ ಗುಂಪಿನಲ್ಲಿ ಗೋವಿಂದ ಜಾಂವ್ಚೆಂ! ಆಮಿ ಇಗರ್ಜೆಂತ್ ಏಕ್, ಹೊಲಾಂತ್ ಆನ್ಯೆಕ್! ಹೆಣೆಂ ಮಾಗ್ಣೆಂ ಮ್ಹಣ್ತಾಂವ್, ತೆಣೆಂ ಬೆಬ್ದೆ ಜಾತಾಂತ್! ಎಕ್ಯೆ ಕುಶಿನ್ ಹಾತ್ ಜೊಡ್ತಾಂವ್, ಆನ್ಯೆಕ್ಯೆ ಕುಶಿನ್ ಅರ್ಧೆಂ ನ್ಹೆಸ್ತಾಂವ್! ದೆವಾಚಿಯ್ ಚಾಕ್ರಿ ಕರ್ತಾಂವ್ ಆನಿ ದುಡ್ವಾಚಿಯ್ ಚಾಕ್ರಿ ಕರ್ತಾಂವ್!!!
